قبيلــــــــــــــــــــي ,,, خضيـــــــــــــري

[ريح العود]

حبيت اطرح هذا الموضوع لاني اشووف الناس ه الاياام طايحين فيه الا وهو :

عبد,,,خضيري,,,قبيلي

هذا اللي ابي اعرفه الحين ليه الناس مقلقينا فيها والله حاله الواحد المسكين لين جا يتزوج ولا غيرة
يردونه ليه ..؟

السبب مالك اصل ولا خضيري ولا ما تفع عبد يعني من ه الكلام اللي يجرح الواحد وغير كذا الحين الله قال: ولا تلابزو بالالقااب

وخيركم عند الله اتقاكم

ما قال لا تزوجون الا القبيلي وغيرة ....

عااد نبي رايكم وش رايكم باللي يقولون ه الكلام <<<عارف ان اسلووبي شووووي عقولة رهيب سياحي بس من القهر والله من ه الكلام

[صيدلي]

موضوع ممــــــــــــــــــــــتاز ومفيد وبارك الله فيك

[شجـون&القلـب]

أحم ..أبدأ بسم الله..
يا أخي ريح العود
أنا مثلك هالموضوع قاهرني يعني اللحين الناس متعلمين وهالحركات احسها حركاات شيبان اول يعني احس عادي ما فيه فرق ابدا...وزيادةعلى اللي قلته اذا رحت تخطب وحدة يتيمة بس مكفولة من عمرها شهر عند ناس معروفين ومتربية ..أو واحد نفس الشئ اهلك انت اذا بتخطب ولا اهلها اذا انت بتخطبها برضوه بردونك بحجة مالهم اصل ..انا هالشي قاااهرني..
وعندك مثال حلقة طاش.. القصة حقيقية وبصراحه اعتبر اللي يهمة هالشئ جاهل وسخيف

وشكرا..أختك::شجون

[ضابط أمن]

ياريح العود
موضوعك تشكر عليه
لكن وش نقول لمن يتعنطز ويقول أنا ....................؟
وفي النهايه تلقاه يتزوج أجنبيه مايندرى وش أصلها ............0

[رهيب]

يعطيك العافية اخوي ريح العود

اولا تصحيح للاية
ولا تنابزو بالالقاب . .

ريح العود . . . تشكر على ما قدمت من موضوع جدير بالنقاش


قال صلى الله عليه وسلم ( تنكح المراءة لأربع .: دينها ومالها وجمالها ونسبها فاضفر بذات الدين تربت يداك )
او كما قال صلى الله عليه وسلم

الرسول حدد النسب . . . ولكن عقب في كلامه فاضفر بذات الدين اي احرص على المراءة ذات الدين والصلاح . . .

العصبية القببلية موجودة من ايام الجاهلية وليست فقط في عهدنا هذا . . .
نعم كلكم ادم وادم من تراب. .
وبلال رضي الله عنه عبد حبشي لكنه في الجنة
وابو جهل من قريش افضل القبائل لكنه في النار

العادات والتقاليد تحكمنا في هذا الشي

انظر لنفسك انت اولا او لننظر الى انفسنا اولا

هل ترضى ان تنكح اختك رجلا عبد او ليس له أصل . . .
اذا انت رضيت العيلة كلها او القبيلة لن ترضى وستكون هناك تفرقة تؤدي الى قطيعة رحم والسبب هذا الزواج
ايضا لا ننسى هذا المرء الذي يتزوج من امراء ذات نسب ماذا سيكون موقفه من كلام اطفالهم واولادهم " يعني لو قالو للزوج ياصلبي وش بتصير في نفسه " وكيف راح يكون تأثيرها على اولاده


انا لا أدعو للتعصب القبلي ابدا
لكن للمنطق
اولا يجب ان نفهم انه لا فرق بين اعجمي ولا عربي الا بالتقوى

( جعلناكم شعوبا وقبائل لتعارفوا ان اكرمك عند الله اتقاكم )
رب هذه الايه لو فهمنها ودرسنها وعقلنها لحلت لنا جزءا كبير من المشكلة

ثانيا
الزواج ليس بلعبة او تجربة
اختيار النسب شيئ ضروري
وكل شخص يريد ان يفتخر بمن يناسب

لكن ناهيك عن التشدد الحاصل

اتمنى ان اكون اوصلت بعض ما اريد ان اوصله
ولي عودة . بعد نقاشكم
رهيب66

[Stocks-Trader]

^ كلام جميل تسلم يمناك


تحية للكاتب,

[دلع]

انا ضد على اللي تقولونه
اهم شيى العرق
وبعدين الشرع قال كذا
يعني في شي اسمه عدم توافق النسب وهذا موجود عندنا في المحاكم
يعنى برايك انتي تتزوجين واحد ماله اصل
او انت برايك تتزوج وحده مالها اصل

يعني هذا الشي معروف عندنا القبيلي مايتزوج الا قبيليه والخضيري مايتزوج الا خضيريه





تحياتي
ولي عوده اخرى

[الاستاذ]

على قولت المثل اللبناني



اللي يخرج من ثوبه يبرد



ولي عوده بالتفاصيل




والشكر كل الشكر لاخي ريح العود






الاستاذ

[رهيب]

ننتظر التفاصبل

سعادة الاستاذ

اختي دلع

انا ما ايدت كلام ريح العود ابديت وجهت نظري

[دلع]

والله اسفه رهيب
ماكنت اقصدك كنت اقصد البقيه

وكلامك عين المنطق

[m0o0n 14]

بصراحه انا بعد يقهرني هالموضوع
لان في النهايه كلنا بشر .........

[صمت وجروح]

اول شي مشكور على الموضوع الحلو
ثاني شي انا معك بكلامك لان ما في فرق بين قبيلي
وخضيري كلهم عبيد الله
بس بصراحة في ناس متخلفين يدققون على هذا الشي
ما نقول غير الله يهديهم

[ريح العود]

مشكووووورين وما قصرتو يعطيكم العافيه ع الردووود الاكثر من الرائعه....


اخوي رهيب صراحة ابدعت في ردك وانا معاك في كل كلمه قلتها...

اختي دلع بس حبيت ابدي رايي في ردك اول شي الحين يعني القبيلي وش فيه زود عن الخضيري يعني له شعر ناعم ولا حلو ولا وش والاصل الخضيري له اصل على ما اعتقد من اللي سمعته والله العالم يعني الحين في بعض الناس اللي اعرفهم يتزوج اجنبيه ولا يتزوج خضيريه يعني بس عشان تعرفين التناقض اللي مدري وش يبي.. واذا عن الخضريه اقص يدي اذا ما كانو الخضيريه بعضهم اجمل من مليون قببيليه ...

وحبيت اقولك اللي مالهم اصل يسمون صلب والخضيريه غير الصلب...

صح لكل قبيلي قبيلته ويفتخر فيها .وانا لي قبيلتي وافتخر فيها بس مو هذا اني اتكبر على الخضيري ما يسمى كلام اجل لو جاك طيار خضيري وفراش قبيلي من تختارين ...؟

الا عاد اذا كنت عنصريه بالحيل فهذي مشكله هههه

ومشكووورة ع المرور اختي دلع..

وسامحوني ع القصور والتاخير في الرد واشكركم جزيل الشكر ع المرور

[رهيب]

ريح العود

المسألة مو مسألة

جمال ومال وعمل

لا ابدا
المسالة مسألة نسب وبس

وهذا السبب اللي يخلينا نمنع من زواج الخضيري


شووووكرن

[ابوصالح]

بصراحهـ ان هذا الموضوع كنت ابيهـ من زمان على نتناقش فيهـ ..

لكن ما قصرت اخوي على الطرح ..

واللهـ يعطيك العافيهـ ولا هنت ..

اما بالنسبة لرايي حول الموضوع ..

هالايام اكثر الناس طايحين فيهـ وبكثرة ..


يعني اذا جا الواحد يتزوج على طووووول على القبيلة ولا العائلة ولا .. الخ ..

وهذا اكبر خطأ ..

يعني ما همهم الاخلاق ، السمعهـ هي زينة ولا شينة ..

اهم شي انهـ قبيلي ولا خضيري ..

وعلى فكرة اذا كان هذا مبدأ كل عائلة ..

فاعتقد ما راح ينجح ولا زواج بهالطريقة ..

وعموماً ..

الحديث يطول اكثر ..

لكن هذا اللي بغيت اضيفة على الموضوع ..

والـــف شكر على الطرح الاكثر من رائع ..

واللهـ يعطيكم العافيهـ جميعاً ..

تقبلوا تحيتي ..

..

..

..
أبـــــوصالـــح

[حبر العيون]

كلنا من خلق الله ولا يوجد فرق بين ابيض واسود
والي يفرق هذا نقص ماهو زود

و شكرا على الموضوع

[مضيع شماغه]

كـــلــنا خلق الله ومستحيل افرق بيووم من الايااام هاذا كذا خضيري وهاذا قبيلي

بل عكس احلاا البناات الخضيريااات بس اصلبيه مـــاادري

بعدين انا مو عشااني قلت الخريضه احلاا البنات تقوولون اي هو خضيري لا انا
قبيلي

[طـو طـو]

شف المسأله ومافيها
ياااااااااا شباب وياااااااابنات
ان انت لو تزوجت والعائله الكريمه ما ترضى عن الزواج
يحصل امممممممممم
الكل يعرف
اقل شي راح يكون فيه خلاف ومشاكل بينكم
صح الكل يهتم
لكن انا ابي افهم بعد ليه يعني الناس تهتم في هذا الشي
انا ماتفرق معي
بس لو تشوف وش راح يكون مشاكل بين العائله تعرف وش السبب
الي يخلي اغلب الناس تتخلى عن الزواج وتهتم في النسب
اتمنى يكون كلامي واضح
وشكور ياريح العود على هذا الموضوع

[خــــاله بيضاء]

مشــــكور ياريح العود على هالموضوع الحلو تصدق وربي علي يشهد اني كنت بكتب عن هالموضوع لانه صدق صار مشكلة المجتع واظاهر انك قد مريت بها التجربه صح ولا
اللي يزيدني قهر ان القبيلي مسيطر عليه الغرور لان اللي غيره اقل منه ومو كلهم بعضهم مع احترامي لكل القبايل والخضيري يستحي يقول انا خضيري وبرضوا مو كلهم بعضهم صدق ان بعض الناس عقولهم صغيرة (ولافرق بين اعجمي ولاعربي الابالتقوى)

[ريح العود]

والله عني الى الحين مامريت ولا راح امر انشالله اللي يفكر به الاشياء البعد عنه راحه وللله الحمد كلن له اصله وفصله يفتخر فيه لنفسه مو لغيره

وعلى ما اعتقد يقولون انه خخضيري للي ما يعرف جدة الخامس

ومشكورين ع المرور ويعطيكم العافيه ومتاسفيييين ع التاخير في الرد

[نــونه]

موضوع مررررررره حلو
ومرره مهم
بس اهم شي الاصل
وهذه وجهة نظري

مشكووور اخوي ريح العود
تقبل مروري
اختك
اذكى خبله

[ღسلطانـ زمانهـღ]

لاا تعليـــــــــــــــــــــــــــــــــــــــــــــــــق ^_^

[ريح العود]

يعطيكم العافيه ع المرور ولاهنتو

[استراليا]

لله يخلف على الي يغكر بها الافكار وبعدين امريكا وصلوا لصطح القمر والله ثم والله ثم والله والله انه عييييييييييييييييييييييييييييييييييييييييييييييييييييب وبعدين هاذي قصت قاضي قبيلي الله يهدية المشكلة انة في امريكي يقول ان كان هذا الكلام عند المسلمين انا ماابغى اسلم وش قال
قال لالالالالالالالالالايسلم وجعلة مااسلم وحنا غنيين عنة واذا مااسلم مردة للسيف بالله هذا كلام اقول المصيبة انة قاضي الله يفتح على قلبة وياشباب الامور في تدهور الله يكون بالعون

[الساري]

موضوع جيد يشكر عليه ريح العود تقول الاية الكريمة (إن أكرمكم عند الله أتقاكم ) والتقوى هنا هو العمل الصالح وليس الحسب والجاة فهذه المشكلة هلى ثقافة مجتمعات نعم وليست مجتمع واحد بعينه فيجب على أي كاتب قبل أن يمسك بقلمة أن يفكر بعمق ماالمردود الايجابي من مقاله فإن رأئ المردود السلبي أكثر فلا يقدم على الكتابة في هذا الموضوع بحيث لايقع على الجرح لأنه لايقع على الجرح إلا الذباب أكرم الله ريح العود وأعضاء المنتدى منه فأنا لاأرى أي جدوى من النقاش في هذا الموضوع لأنه يوسع الفجوة بين طبقات المجتمع التي ذكرتها في مقالك ويشعر المعنين به بالنقص وخلافه فمثل هذه الأمور لاتحل عن طريق وسائل الإعلام مجتمعة فقط .

[مضيعه بلنتي]

انا بالنسبه لي صح اهم شي الاصل بس اني ماااحب افتحها لان في ناس يتضااايقوون منها والصراااحه مااحب افتح مواااضيع مثل هاااذي بعدين هذي السواااالف حقة الشياااب الله يعطيهم الصحه والعافيه وماااقول لافرق بين اعجمي ولاعربي ولا ابيض ولااسود الا بالتقووووى ولو فكرت انت قبيلي ولا خضري بتتعب بس ابي كل وااااحد يتذكر انه مخلوووق من تراااب وهذا اهم شي صح اني بنت ناس بس ماااحب افتح هالسوااالف والعصبيه القبليه ومشكوووور على هالموضوع

[A L N J L A]

ريح انا تو انتبه للموضوع في بعض الناس كذا يطلعون اصلك من فصلك واذا انت على قولك عبد خضري حضري قبيلي من هذا الكلام بس هذا يسبب العنوسه للبنات والرجال مساكين ياخذون بنات من برا ويبتلشون فيهم





انا صديقه لي من قبيله معروفه ومايتزوجون الا من قبيلهتم يعني عيال عم عيال خال كذا وهي البنت ياعمري عدت ال28 وهي ماتزوجت يعني على كلامهم وهي تضحك خلصو عيال عمها وعيال خوالها من وين تجيب لها رجال



استنساخ اتوقع من قبيلتهم


مع احــــــــــــــــــــــــــــــــــــــــــــــــــــترامي لجميع القبايل على عيني وعلى راسي والله بس نبي نحل هذا المشكله





جوريه برشلونه

[أميرالقلوب]

ما أقول الا الله يعينهااااااا على القعده وربي صج مشكله تنتحر البنت يعني ولا تاخذ رجال من براا والله حاله صارت مثل الرجال ياخذ من براااااا يعني ليش ليش ...؟

ما أقول الا عسى الله يكتب لها النصيب ولا يوقف عندها وعند غيرها .........؟


والله مدري وش اقول يا أختي جوريه صج حاله ميؤووس منها ..


شاكرلج على الموضوع الحساس هذا ... تقبلي هجومي اقصد مروري ..؟


من المخلص دائماا .,,,: أمـــــيرالقلــــوب ,,, ودمتم ؟





:h57:

[كبرياء أنثى]

السلام عليكم..
عضوه جديد وموضوعك غصبني تكون اول مشاركتي فيه..
لكل اللي يقولون خضيري وقبيلي..ولا تكافؤ نسب..
روى ابن عدي أن رسول الله صلى الله عليه وسلم قال : " تزوجوا في الحجز الصالح، فإن العرق دساس" وهذا الحديث رواه الموقدي عن الزهري، قال ابن الجوزي: قال يحيى: الموقدي ليس بشيء، وقال النسائي: متروك، وقال علي :لا يكتب حديثه، ورواه الديلمي في مسند الفردوس والمديني في كتاب تضييع العمر عن ابن عمر وزاد وانظر في أي نصاب تضع ولدك، قال الحافظ العراقي: وكلها ضعيف.‏
ولذلك حكم الشيخ الألباني على هذا الحديث بأنه موضوع كما في ضعيف الجامع الصغير
انا عمتي قبيلية ومتزوجة واحد متجنس وعايشة بسعاده معاه الله يديمها عليهم..
==
متى نرتقي بتفكرينا ونكون أكبر من هالامور..ليه دايم نهتم بأمور ظاهرية مالها أي قيمة في الدين..ليه نخلي عاداتنا تتغلب على ديننا.. اذا دييننا منع التفاخر بالانساب احنا ليه نحاول نرجع الجاهلية..؟؟
نسينا أو تناسينا قول الرسوال-اللهم صلي وسلم عليه-:(أربع في أمتي من أمر الجاهلية لا يتركونهن الطعن في الأنساب، والفخر بالأحساب، والاستسقاء بالنجوم والنياحة)
( وَجَعَلْنَاكُمْ شُعُوبًا وَقَبَائِلَ لِتَعَارَفُوا إِنَّ أَكْرَمَكُمْ عِنْدَ اللَّهِ أَتْقَاكُمْ) ربي قال لتعارفوا مو لتحاقروا..الحين هم الاغلبية خضيري وقبيلي وطرش بحر واصلي ولا تقليد..!!
عشان كذا العرب مايتطورون لانهم مازالوا ينبشون ويتمسكون بأمور لاتنفع ولا تسدي..
لاننسى اننا كلنا تراب ومن ادم وبنرجع لتراب..
على العموم لو بنتطرق للموضوع ذا بنطول واحنا ماخلصنا..
جزاك الله خير على الموضوع..
تحياتي..
كبرياء أنثى..